Christy 
《東張西望》昨晚節目報道一宗個案，新移民女子懇求酌情取得公屋戶籍的事件。梁太於2018年帶同女兒由內地來港，與在香港生活的梁生結婚。婚後以雙程證往返中港兩地，可惜梁生不幸患上腦腫瘤，接受手術後未能完全康復，梁太奔波兩地照顧丈夫，受疫情影響期間就只能透過視像見面。梁生身體情況越來越差，梁太聲稱在丈夫建議下申請公屋，成功上樓，不過梁太持雙程證來港，手持「行街紙」未獲發身份證，未能在戶籍上加上名字。
梁太話好想留香港生活，再接埋個女嚟香港。（《東張西望》電視截圖）
梁太接受吳幸美的訪問時聲淚俱下，稱申請的過程全部是她一手一腳去做，揚言「唔明白點解加個名咁難？」後來梁生腦腫瘤復發，未能接受任何治療，最終離世。梁太喊住講：「啱啱先上到公屋，佢話唔想死。房署要求本人去簽名先可以做呢件事（加名），醫生話可以酌情叫房署嘅人去醫院做個見證，醫院有類似個案，可以安排。」梁太拿着早前「酌情安排」申請女兒來港探望親人的信件去房署，「呢間公屋真係我好辛苦咁申請過嚟㗎囉，房署又堅持話要咩文件，又要我先生在場，我話冇理由，我先生已經戴住個（氧氣罩），我話呢件事我做唔到出嚟，要佢出醫院我做唔到囉！我求房署可唔可以酌情處理去醫院，佢都話做唔到。」
直至11月16日，梁太終於成功獲發身份證，她帶同醫生紙及印有丈夫指模的信件等文件去房署，惟申請未獲批，房屋署稱有機會收回公屋。「我作為佢唯一合法妻子，我長時間咁樣照顧佢，申請公屋都好艱難，嗰吓話我冇身份證，而家我有身份證喇！佢在生時你唔畀我加名，我唔知係咩原因囉！我想喺香港好好生活，有間公屋，因為呢度我先生住過，加上我答應丈夫會好好照顧個女，我到時都想接埋個女過嚟呢邊（香港）！」
梁太話申請公屋過程好辛苦，全部都係佢自己搞，點解加佢名咁難喎！（《東張西望》電視截圖）
網民全部唔多Buy呢宗個案，留言勸事主返大陸。（《東張+》YouTube）
網民一邊睇一邊鬧！（《東張+》YouTube）
以往《東張西望》報道的個案，不少獲得網民同情、支援，不過這次他們似乎唔太Buy，紛紛說︰「呢啲係天意，香港好多人慘過佢多多聲。《東張》唔好幫佢打尖，香港有需要的人多的是」、「我好同情事主，但是香港有香港規則，其實社會真是很多慘事，她是冰山一角」、「妤多土生土長嘅香港人等到死嗰日都上唔到樓」、「係咪上《東張》就可以有屋？咁住劏房，等左（咗）好多年咁d（啲）公平咩？《東張》呀，你哋冇審核個案先出街㗎」、「識做戲，識搵《東張》，搶本地人資源，你話值唔值同情」、「雖然有啲可憐…但係其實個女都唔係個死者（親生）嘅！兩母女返上大陸就冇拖冇欠」等等。網民洗版式留言都認為《東張》幫錯人。
